༣༠༽ ནང་ཆེན་གདུང་རབས་རེ་དགུ་པ་རྒྱལ་སྲས་ཨ་ཆེན་རིན་པོ་ཆེའི་སྐབས།
ནང་ཆེན་རྒྱལ་པོ་བཀྲ་ཤིས་ཚེ་དབང་རྡོ་རྗེ་ནས། ཤར་ཕྱོགས་སྡེ་དགེ་རྒྱལ་པོའི་<<སྡེ་དགེ་རྒྱལ་པོའི་སྲིད་དོན་ལོས་རྒྱུས་ལས།>>རྒྱལ་རབས་ཉེར་གཅིག་པ་ཨ་ཇའམ་རྡོ་རྗེ་སེང་གེའི་སྲས་མོ་གཡུ་སྒྲོན་བཙུན་མོར་བཞེས་ལ། སྲས་ཨ་ཆེན་ནམ་རྒྱལ་སྲས་ཕྲིན་ལས་ཀུན་ཁྱབ། ཀུན་དགའ། ཨ་ཆུང། སྲས་མོ་མོ་དགའ། གཡུ་རྡིལ། གཡུ་ཆུང་། ཟུར་སྲས་ཕུན་ཚོགས་དགྲ་འདུལ་བཅས་ལྕམ་སྲིང་བདུན་བྱུང་བ་ལས། ༧ སྐྱབས་རྗེ་རྒྱལ་སྲས་ཕྲིན་ལས་ཀུན་ཁྱབ་བམ་ཨ་ཆེན་རིན་པོ་ཆེ་ནི། རབ་རྒྱལ་ས་སྟག་སྤྱི་ལོ་ ༡༩༣༨ ལོར་སྐུ་འཁྲུངས། ཡབ་རྒྱལ་པོ་དམ་པ་མཆོག་དང་། གནས་ལྔ་རིག་པའི་པཎྜི་ཏ་ནང་ཆེན་པོ་ནང་ཆེན་མཁན་པོ་རྣམ་རྒྱལ་བཟང་པོ་སོགས་ལས་མདོ་རྒྱུད་རིག་གནས་དང་བཅས་པ་སྦྱངས་པས་མཁྱེན་རྒྱ་ཡངས་ཤིང་། དགུང་གྲངས་བཅོ་བརྒྱད་སྤྱི་ལོ་ ༡༩༥༥ ལོར་ཡུམ་སྲས་ལྷན་རྒྱས་དབུས་ཕྱོགས་སུ་གནས་མཇལ་དང་ཞབས་སྐོར་ལ་ཕེབས། གོང་ས་ལྷ་མའི་རྣམ་འདྲེན་མཇལ་བཅར་ཞུས། ལྷ་སའི་སྨོན་ཆེན་མོར་འགྱེད་ཆེན་ཐེངས་གསུམ་ཕུལ་ཏེ་བསྟན་འགྲོར་སྨན་པའི་ཐུགས་སྨོན་གང་ཟབ་གནང་། སྤྱི་ལོ་ ༡༩༥༨ ལོ་དུས་ཟིང་སྐབས་བྲོས་བྱོལ་དུ་ཕེབས་པ་ལས་ལྷ་ས་ནས་བཟུང་ཏེ་ཟི་ལིང་དུ་དེད། དེ་ནས་རིམ་བཞིན་རིག་གསར་སྐབས་བསམ་ཡུལ་ལས་འདས་པའི་འོ་བརྒྱལ་མྱང་ཆེ་བས་སྐུ་ལུས་ཞ་གྲུམ་སྐྱོན་ཅན་དུ་གྱུར། རྗེ་ཁོང་ནི་བོད་ཀྱི་རིག་གཞུང་ལ་མཁས་པ་ཙམ་དུ་མ་ཟད་རྒྱ་ནག་གི་སྐད་ཡིག་ཀྱང་ཧ་ཅང་མཁྱེན་རྒྱ་ཆེ། སྤྱི་ལོ་ ༡༩༨༦ ལོར་ཀུན་གཟིགས་པཎ་ཆེན་རིན་པོ་ཆེའི་གདན་ཞུས་བཀའ་ཕེབས་ལྟར། པེ་ཅིན་དུ་ཕེབས་ནས་ལོ་ངོ་གསུམ་གྱི་རིང་ལ་བོད་རིག་པའི་ཞིབ་འཇུག་ཁང་དང་། པེ་ཅིང་ནང་བསྟན་མཐུན་ཚོགས་ལ་སློབ་ཁྲིད་གནང་ནས། པཎ་ཆེན་རིན་པོ་ཆེའི་དགོངས་བཞེས་རྫོགས་པར་མཛད་ཅིང་བོད་རིག་པའི་ཞིབ་འཇུག་ཁང་གི་བློ་འདྲི་མི་སྣར་བཀོད། ལྷ་ལྡན་གཙུག་ལག་ཁང་དུ་གུ་རུ་མཚན་བརྒྱད་ཀྱི་ལྷ་ཁང་རྟེན་དང་བརྟེན་པ་བཅས་བཞེངས་བསྐྲུན་མཛད། སྤྱི་ལོ་ ༡༩༨༧ ལོར་ཞང་ལྕགས་བཟའ་བསོད་ནམས་སྒྲོལ་མ་ཆུ་ཡུས་ལོ་པ་བགྲང་བྱ་ཉེར་ལྔར་སོན་པ་ཞིག་བཙུན་མོར་བཞེས། རིགས་ཀྱི་སྲས་མོ་བདེ་སྐྱིད་ཆོས་མཚོ་དང་། ཚེ་དབང་ལྷ་མོ་གཉིས་འཁྲུངས། སྲས་པོ་མེད། དེ་བཞིན་དབང་ལུང་ཁྲིད་གསུམ་སོགས་ཡང་དར་བསྟན་པའི་ཤིང་རྟ་འདྲེན་མུས་སུ་མདོ་སྟོད་སྐྱེ་རྒུའི་བསོད་ནམས་ཉམས་དམན་པས་རབ་རྒྱན་ལྕགས་སྟག་སྤྱི་ལོ་ ༡༩༩༠ ལོར་ཟླ་བ་ ༦ པའི་ཚེས་ ༣ ཉིན་གློ་བུར་དུ་ནང་ཆེན་བླ་ཆབ་དགོན་དུ་དགུང་གྲང་ ༥༢ ཐོག་ཞིང་གཞན་དུ་གཤེགས།