༄༅།།རྫ་ཆུའི་དཔྱད་བརྗོད།། ་ བོད་མདོ་དབུས་མཐོ་སྒང་ནས་བཞུར་བའི་ཡོངས་སུ་གྲགས་པའི་ཆུ་བོ་ཆེན་པོ་རྨ་འབྲི་རྫ་གསུམ་དང་རྒྱལ་མོ་རྔུལ་ཆུ་བཅས་ཡོད་པའི་ནང་ནས། ད་ལམ་རྫ་དཀར་ནག་ལྕིབས་གསུམ་གྱི་གཞུང་ནས་ཐོན་པའི་ཆུ་བོ་རྫ་ཆུ་གཡུ་འབྲུག་གྱེན་འགྲོས་ཀྱི་མགོ་ཁུངས་ཅུང་ཙམ་ཞིག་བརྗོད་ན། ༈ རྫ་ཆུའི་མགོ་ཁུངས་ནི་དགེ་རྒྱལ་རྫ་དཀར་ནག་ལྕིབས་གསུམ་ཞེས་པའི་གཞུང་ཆེན་ལུང་པ་ཁ་ནུབ་ཏུ་བསྟན་པ་ལྟ་བུའི་གསུམ་ཡོད། ལུང་པ་དེ་གསུམ་གྱི་མགོར་རྫ་ནག་རི་རྒན་མའམ་སྔོན་སློབ་དཔོན་ཆེན་པོས་དམ་བཞག་སྐབས་གསོལ་བའི་མཚན༼ཕྱྭ་རྒྱལ་མེ་ཏྲི༽མིང་གཞན་དུ་རྫ་སྟོད་རྒྱལ་ལམ་རྫ་ནག་རི་རྒན་མ་ཞེས་པའི་རི་བོ་དེར་ཡོད། རྫ་ནག་རི་རྒན་གྱི་གཡས་ཕྱོགས་རྫ་ནག་ལུང་པའི་རི་རྒྱུད་ཀྱི་རྫ་ནག་ཧོར་པ་འབྲུག་དེའུ་ནས་བབས་པའི་རྫ་ནག་ཆུ་དང་། གཡོན་རྫ་དཀར་ལུང་པའི་རི་རྒྱུད་ཆུ་མགོ་བཀྲ་ཤིས་འཁྱིལ་བ་ནས་ཐོན་པའི་རྫ་དཀར་ཆུ་བོ་དང་། རྫ་ནག་རི་རྒན་གྱི་མདུན་ཕྱོགས་རྫ་ལྕིབས་ལུང་པའི་ནང་ནས་ཐོན་པའི་རྫ་ལྕིབས་ཆུ་བོ་དང་གསུམ། རྫ་ནག་རི་རྒན་གྱི་ཤར་ཕྱོགས་སྤྱི་ལེ་སུམ་ཅུའི་ཡན་མན་གྱི་མཚམས་ནས་ཆུ་བོ་གསུམ་ལྷན་དུ་འདུས་པའི་སར་རྫ་སྙིང་དཀར་ནག་སུམ་མདོ་ཞེས་ཟེར། ཡུལ་ལྷའི་བརྒྱག་བརྔན་ཆེན་མོའི་ནང་། ༼རྫ་སྙིང་དཀར་ནག་སུམ་མདོ་བརྔན༽ ཞེས་པའི་ས་དེ་ཡིན། རྫ་དཀར་ནག་ལྕིབས་གསུམ་འདུས་པའི་ཆུ་བོ་དེ་ཤར་དུ་བབས་ནས་དེང་དུས་རྫ་སྟོད་རྫོང་མཁར་ནས་བབས་པའི་རྫ་ཆུ་ཞེས་པའི་ཆུ་བོ་དེའོ། དེ་ཡང་སྔོན་དུས་ནས་བརྗོད་སྲོལ་ལྟར་ན་ཆུ་བོ་དེ་ཉིད་སྟོད་ནས་འབབ་སྐབས་དགེ་རྒྱལ་རྫ་ཆུ་ཞེས་འབོད་པ་དང་། བར་ནང་ཆེན་ས་ནས་ནང་ཆེན་རྫ་ཆུ་དང་། སྨད་ཆབ་མདོའི་ས་ནས་རྫ་ཆུ་དང་ལྕི་ཆུ་གཉིས་ཟླ་སྒྲིལ་ནས་འབབ་པའི་དུས་ཆབ་མདོའི་ཟླ་ཆུ་ཟེར། རིམ་བཞིན་བབས་མཐར་བྲག་གཡབ་ས་ནས་བྲག་གཡབ་གླ་ཆུའམ་ཁམས་པ་གླ་ཆུ་ཞེས་དང་། ཕྱི་རྒྱལ་ཁབ་ཀྱི་ས་ནས་མེས་ཀོང་གཙང་པོ་ཞེས་འབོད་པའོ།། …
༈ ཤུལ་མ་རྫ་ཆུ་ཁ་མིན། བསྟན་འཛིན་ཐར་འདོད་ནས།
༈ ཤུལ་མ་རྫ་ཆུ་ཁ་བ་མིན་པའི་སྒྲུབ་བྱེད་ལྷག་མ། ཉེ་སྔོན་བདག་གིས་ཕྱོགས་ཞེན་དང་རུས་འཐེན་གང་དང་ཡང་མ་སྦྲེལ་བར་འདས་སོང་གི་ལོ་རྒྱུས་དང་ད་ལྟའི་གནས་བབ་ལ་གཞིག་སྟེ་རང་གི་བསམ་ཚུལ་དག་མ་དེ་དྲྭ་ལམ་དུ་བཞག་པ་ཡིན། དྲྭ་ལམ་ནི་མཐའ་གྲུ་ལས་རྒྱ་ཆེ་ལ་རླུང་བུ་ལས་བང་ཁ་སྐྱེན་སྟབས་བདག་གི་བསམ་ཚུལ་དེ་ཡང་ས་རྡུལ་ལྟར་ཕྱོགས་གང་སར་འཐོར་སོང་ཟིག དེ་ལ་དྲྭ་ལམ་ཁག་ཏུ་བདག་ལ་ཕྱོགས་པའི་དྲི་བ་གཉིས་ཡོད་པར་སྣང་སྟེ། བསྟན་འཛིན་ཐར་འདོད་སུ་ཡིན་པ་དང་། ཤུལ་མ་རྫ་ཆུ་ཁ་བ་མིན་པའི་སྒྲུབ་བྱེད་ལྷག་མ་བཅས་རེད། འདིར་ངས་ཟུར་མིང་ཞིག་བཀོལ་བ་དེ་ཤུལ་མ་རྫ་ཆུ་ཁ་བ་མིན་ཞེས་པའི་སྐད་ཆ་འདི་ལ་འཚང་ཞིག་དང་གསང་བ་ཞིག་ཡོད་ནས་མིན་ལ་རང་གི་ངོ་གདོང་བསྟན་མ་སྤོབས་པར་བྲེད་ནས་མདའ་མོ་འཇབ་འཕེན་བྱས་པ་ཞིག་ཀྱང་མིན། ཁྱེད་རྣམས་ཀྱིས་སུ་ལ་དོག་པ་ཟོས་ན་ང་ནི་མི་བུ་དེ་རང་ཡིན་སྲིད། སྐབས་འདིར་ང་རང་ཉིད་སུ་ཡིན་མིན་དེ་གལ་མི་ཆེ་བས་གནས་སྐབས་ལན་མེད། ཕྱི་མ་དེ་ལ་བསམ་པ་བྱ་བ་མང་དག་ཅིག་འདུག འདི་ལ་བོད་ཕྱི་ནང་གང་སར་བཞུགས་པའི་གཞོན་སྐྱེས་སྨྱུག་ཐོགས་པ་གང་འཚམ་ཞིག་གིས་སོ་སོ་ལ་འཆར་བའི་དགོངས་ཚུལ་དག་མ་རེ་བརྗོད་འདུག་པ་ཚོར་བས་ཧ་ཅང་དགའ་བོ་བྱུང་། ལོ་རྒྱུས་ནི་ལོ་རྒྱུས་རང་དང་། བྱུང་བ་ནི་བྱུང་ཟིན་པ་རང་ཡིན་པས་འདི་ལ་གཟུར་བོར་གནས་དགོས་པ་ནི་ཧ་ཅང་གནད་འགག་ཅན་ཞིག་ཏུ་སྣང་། བྱུང་ཟིན་པ་ཞིག་གི་ངོས་ནས་གླེང་ཡོང་དུས་ཕྱོགས་རུས་དང་སྡང་ཟུག་བྱེད་རིན་མེད་ལ་བྱས་པས་ཀྱང་མི་ཕན། འོན་ཀྱང་འགའ་ཤས་ནི་སྔར་བཤད་པ་ལྟར་རྡོག་ལམ་རྟོལ་བའི་འགྲོན་པོ་བཞིན་རྐང་མགོ་གར་གཏད་མེད་པར་འཁྱོར་འགྲོས་བྱེད་པར་མཐོང་བ་དང་། ཡང་ངས་སྔར་བཤད་པ་དེ་ལ་འགའ་ཤས་ཀྱིས་ཟུར་མང་པོ་ཞིག་ཀྱང་བཏགས་འདུག་པར་མངོན་པས་དེ་དག་ལམ་གོལ་བ་ལས་ལྡོག་པའི་ཆེད་དང་གསལ་བཤད་ཙམ་གྱི་དོད་དུ་ཡང་གཅིག་ཞུ་དགོས་བྱུང་། ངས་ནི་ཤུལ་མ་རྫ་ཆུ་ཁ་བ་མིན་པའི་རྒྱུ་མཚན་ཙམ་ལས་མཐའ་གཅིག་ཏུ་རྫ་ཆུ་ཁ་བ་སྡུག་པོ་ཡིན་ཞེས་མཐུན་སྒྲིལ་ལ་གནོད་པའི་ཚིག་སྦྱོར་རྐང་གཅིག་ཀྱང་བཤམས་མེད། དྲྭ་རྩོམ་དེར་(དོན་དངོས་དང་མཐུན་མིན་ཇི་ལྟར་ཡང་)ཞེས་པ་དང་(སྤྱི་ཚོགས་གང་ཡིན་ཡང་མི་ཡག་སྡུག་འདྲ་མིན་ཡོང་བ་ནི་ཆོས་ཉིད་ཅིག་ཡིན་ལ)ཞེས་བྲིས་ཡོད། ང་ཚོའི་སྤྱི་ཚོགས་ཁྲོད་དུ་དེ་འདྲའི་མཐོང་ཚུལ་ཞིག་ཡོད་པ་ནི་མངོན་གསལ་རེད། དཔེར་ན་རྫ་ཆུ་ཁ་བ་དག་གིས་རྒྱ་སྡེ་རོ་ནས་རྟ་ཟོག་རྐུ་འཕྲོག་བྱེད་པ་དང་། རྒྱ་སྡེ་དག་གིས་ནོམ་པ་རྗེས་གཅོད་བྱེད་པ་བཅས་ཀྱི་བྱུང་ཟིན་གྱི་ཟིན་ཐོ་དག་ནི་བྱུང་ཟིན་པ་རང་ཡིན་པས་ཇི་ལྟར་བསུབ་ཐུབ། ཤུལ་མ་ཚང་གིས་ཀྱང་འབུམ་རྙིང་ཚང་གི་རྟ་ཇག་པ་ཞིག་བསད་དེ་རྐུན་པོའི་རོ་འགུགས་སྒྲོལ་གཡབ་མོ་དང་བཅས་ཏེ་མཆོད་རྟེན་གྱི་འོག་ཏུ་གནན་པ་བྱས་ཚུལ་ནི་ཤུལ་གྲགས་འབུམ་གྲགས་ཀྱི་གནས་ཚུལ་ཞིག་ཡིན། རྒྱུ་མཚན་དང་གནས་ལུགས་རྗོད་སྐབས་དྲང་དགོས་ཤིང་། འདས་དོན་དང་ལོ་རྒྱུས་འཆད་སྐབས་ནི་ཐམས་ཅད་ནས་ཐམས་ཅད་དུ་གླེང་དགོས། འདི་ལ་རེ་དོགས་དང་དགའ་ཞེན་གྱིས་སྦ་གསང་བྱེད་ཅིང་དངོས་དོན་གཞན་དུ་བསྒྱུར་བ་ནི་ལོ་རྒྱུས་ལ་ནག་ཐིག་ཕབ་པ་ཞིག་ཅི་ལ་མིན། ཤུལ་མ་རྫ་ཆུ་ཁ་བ་མིན་ཞེས་པའི་སྐད་ཆ་འདི་ནི་དཔེར་བཞག་ན་ཤེལ་ངོས་གྲུ་བཞི་ལྟ་བུ་ཞིག་རེད། ཤེལ་ངོས་གྲུ་བཞི་ནི་མདུན་ནས་བལྟས་ཀྱང་གྲུ་བཞི་ཡིན་ལ་རྒྱབ་ནས་བལྟས་ཀྱང་གྲུ་བཞི་ཞིག་རེད། ཤུལ་མ་རྫ་ཆུ་ཁ་བ་མིན་པ་ནི་རྫ་ཆུ་ཁ་བའི་ངོས་ནས་བལྟས་ཀྱང་རྫ་ཆུ་ཁ་བ་མིན་ལ་ཤུལ་མའི་ངོས་ནས་བལྟས་ཀྱང་རྫ་ཆུ་ཁ་བ་མིན། ཁག་ཅིག་གིས་དེང་སྐབས་ཤུལ་མ་རྫ་ཆུ་ཁ་བ་དང་འབྲེལ་ཆེ་བས་རྫ་ཆུ་ཁ་བ་ཡིན་སྙམ་པ་དང་། ཡང་ཤུལ་མ་རྫ་ཆུ་ཁ་བ་མིན་ན་དེ་དག་དང་འབྲེལ་ཐག་ཆད་འགྲོ་སྙམ་པ་ནི། ཤུལ་མ་རྫ་ཆུ་ཁ་བ་ཡིན་པའི་སྒྲུབ་བྱེད་དུ་སོང་བ་ལྟ་ཅི། ལོ་རྒྱུས་དང་བྱུང་བའི་གནས་ཚུལ་མ་མཐོང་བར་རང་གི་སྙིང་ཆུང་དགའ་ཞེན་དང་རེ་དོགས་ཁོ་ནའི་དབང་དུ་ཕྱིན་ཏེ་རང་ལ་གནས་ལུགས་དེ་ཙམ་ལས་གཞན་མེད་དོ་ཞེས་སྒྲོག་པའང་ཞར་ལ་ཐོན་འདུག ཁྱེད་ཀྱི་ཞེ་འདོད་ལ་ཤུལ་མ་རྫ་ཆུ་ཁ་བ་མིན་ཞེས་བཤད་ན་རྫ་རྒྱུད་མཉམ་འབྲེལ་ཚོགས་པ་དང་། མདོ་སྟོད་འཇང་དགུན་ཆོས་ཐོག དེ་བཞིན་སེར་ཤུལ་དགོན་དུ་གྲྭ་རྒྱུན་གྱི་ཐོབ་ཐང་བཅས་པ་ཕྱིར་བསྡུ་བྱེད་དགོས་སྙམ་པ་དེ་རེད། འདིས་ནི་ཁྱེད་ཀྱི་སེམས་ཁམས་དེ་ཁབ་མིག་ལས་ཀྱང་དོག་པ་གསལ་བོར་བྱས་པ་མིན་ནམ། དེ་བཞིན་ཡང་ཤུལ་མ་རྫ་ཆུ་ཁ་བ་ཡིན་པའི་སྒྲུབ་བྱེད་ལ། ང་ཚོའི་དམངས་ཁྲོད་དུ། ངའི་ཕ་ཡུལ་རྫ་ཆུ་ཁ་བ་རེད།…