བོད་རྒྱལ་སོ་གསུམ་པ་སྟེ་ཆོས་རྒྱལ་སྲོང་བཙན་སྒམ་པོ་ནི། ཡབ་གནམ་རི་སྲོང་བཙན་དང་། ཡུམ་འབྲི་བཟའ་ཐོད་དཀར་གཉིས་ཀྱི་སྲས་སུ་དུས་རབས་བདུན་པ། མེ་གླང་ཕྱི་ལོ་ ༦༡༧ ལོའི་དཔྱིད་ཟླ་ ༣ པའི་ནང་དུ་མལ་གྲོ་རྒྱ་མ་ནང་གི་ཕོ་བྲང་བྱམས་པ་མི་འགྱུར་གླིང་དུ་སྐུ་བལྟམས་པ་ཡིན། ཡབ་ཀྱི་སྐབས་ཞང་ཞུང་དང་། སུམ་པ། ཉང་དྭགས་སོགས་ཆབ་འོག་ཏུ་བསྡུས་ཟིན་ན་ཡང་། རྒྱལ་བློན་བར་གྱི་འཐབ་རྩོད་འོག ཕྱི་ལོ་ ༦༢༩ པའི་ས་གླང་ལོར་ཡབ་གནམ་རི་སྲོང་བཙན་དུག་གིས་བཀྲོངས་ཤིང་། སྲོང་བཙན་དགུང་ལོ་བཅུ་གསུམ་ཐོག་རྒྱལ་སྲིད་ལ་འཁོད། སྔ་རྗེས་སུ་བཙུན་མོ་རུ་ཡོང་བཟའ་དང་། ཞང་ཞུང་བཟའ་ལི་ཐིག་སྨད། མོང་བཟའ་ཁྲི་ལྕམ་བཅས་བོད་མོ་གསུམ་ཁབ་ཏུ་བསུས། ཕྱི་ལོ་ ༦༣༢་པའི་ཆུ་འབྲུག་ལོར་བལ་བཟའ་ཁྲི་བཙུན་བོད་དུ་བཙུན་མོར་གསུས་ཤིང་འོ་སྐོལ་གྱི་སྟོན་པ་དགུང་ལོ་བརྒྱད་པ་ཇོ་བོ་མི་བསྐྱོད་རྡོ་རྗེ་སྤྱན་དྲངས། ཐོན་མི་སམ་བྷོ་ཊ་སོགས་བོད་ཀྱི་གཞོན་ནུ་ཁག་རྒྱ་གར་དུ་མངགས་ནས་བོད་ཡིག་གསར་གཏོད་མཛད་པ་ཡིན། དེ་རྗེས་ཕྱི་ལོ་༦༣༤ ལོར། ཐོག་མར་བཙུན་མོ་སློང་ཞིང་། ཕྱི་ལོ་ ༦༣༨ པའི་ས་ཁྱི་ལོ་ཙམ་ལ་དྲག་པོའི་དམག་དཔུང་དང་། ཞི་བའི་ཕོ་ཉ་མངགས་པ་བཅས་ཐབས་བཀོད་སྣ་ཚོགས་ཀྱིས་ཀོང་ཇོ་བཙུན་མོར་བསུས་ཤིང་། ཇོ་བོ་ཤཱཀྱ་མུ་ནེ་དགུང་ལོ་བཅུ་གཉིས་ཚད་ཙམ་དེ་བོད་དུ་སྤྱན་དྲངས། ཐོག་མར་སྲོང་བཙན་སྒམ་པོས་བོད་ཀྱི་རྒྱལ་ས་ལྷ་སའི་སྐྱིད་ཤོད་དུ་སྤོ་རྒྱུ་ཐུགས་ལ་དགོངས་པ་ནས་ཡུལ་དེར་སྤོས་ཤིང་རིམ་གྱིས་སྐུ་མཁར་མ་རུ་འམ་ཕ་བོང་ཁའི་ཕོ་བྲང་མཁར་དགུ་ཐོག་ཞིག་བརྩིགས། རྒྱལ་པོས་དགོངས་གཞི་ལྟར་ཐོན་མིས་བོད་ཡིག་གསར་གཏོད་མཛད་པ་དང་བརྡ་སྤྲོད་ཀྱི་བསྟན་བཅོས་བརྒྱད་ཙམ་མཛད། སྐབས་དེ་ཙམ་ན་ཆོས་རྒྱལ་ཉིད་ཀྱིས་ཉང་བྲན་ཕ་བོང་ཁ་ནས་མ་ཎི་བཀའ་འབུམ་དེ་ཉིད་མཛད་པར་གྲགས། ལྷ་སའི་རི་ལ་ཕོ་བྲང་པོ་ཏ་ལ་དང་། དབུས་སུ་ཇོ་ཁང་། ར་མོ་ཆེ། མཐའ་འདུལ་ཡང་འདུལ་གྱི་གཙུག་ལག་ཁང་སོགས་བཞེངས། གཞན་ཡང་རྒྱ་གར་ནས་སློབ་དཔོན་ཀུ་ས་ར་དང་བྲམ་ཟེ་ཤཾ་ཀ་ར། བལ་པོའི་སློབ་དཔོན་ཤྲཱི་ལ་མཉྫུ། རྒྱའི་སློབ་དཔོན་ཧ་ཤང་མ་ཧཱ་ཡཱ་ན་སོཊ་སྤྱན་དྲངས། སྡེ་སྣོད་གསུམ་སོགས་རྒྱུད་ཀྱི་ཆ་ལག་མང་པོ་ཞིག་བོད་སྐད་དུ་བསྒྱུར་བ་དང་དམ་པའི་ཆོས་ཚུལ་བཞིན་སྨྲ་བའི་སྒོ་ཐོག་མར་ཕྱེ། བོད་སྤྱི་མཐུན་ལ་དབང་བའི་ཆོས་ཁྲིམས་དགེ་བ་བཅུ་དང་མི་ཆོས་གཙང་མ་བཅུ་དྲུག་གིས་མཚོན་ལུགས་གཉིས་བཀའ་ཁྲིམས་བཟང་པོའི་སྲོལ་གསར་དུ་གཏོད། འཕྲུལ་བློན་མཛངས་པ་ཐོན་མི་དང་། ཁྲི་བཟང་། ཡང་སྟོན་གཙོས་འཕྲུལ་མི་བརྒྱ་ཙམ་སྐྱེད་སྲིང་མཛད། ཕྱི་ལོ་༦༥༠ པ་ལྕགས་ཁྱི་ལོར་ལོར་སྐུ་གཤེགས། ཡར་ཀླུང་འཕྱོང་པོའི་ནང་དུ་བང་སོ་ལྷ་ཁང་ལྔ་ཡོད་པ་ཞིག་བཞེངས་པའི་རེའུ་མིག་ དབུས་མའི་ང་བཞུགས་སུ་གསོལ།
