སྤུ་རྒྱལ་སོ་དྲུག་པ་ཆོས་ལྡན་རྒྱལ་རབས་བཞི་པ་འདུས་སྲོང་མང་རྗེའམ་རླུང་ནམ་འཕྲུལ་གྱི་རྒྱལ་པོ་ནི་ཡབ་མང་སྲོང་མང་བཙན་དང་། ཡུམ་འབྲོ་བཟའ་ཁྲི་ལོད་གཉིས་ཀྱི་སྲས་སུ་ཕྱི་ལོ་ ༦༧༦ པ་མེ་བྱི་ལོར་འཁྲུངས། ལོ་ངོ་བཞི་ལ་ཐོན་པའི་ས་ཡོས་ཏེ་ཕྱི་ལོ་༦༧༩ པའི་ལོར་རྒྱལ་པོའི་ཁྲི་ལ་འཁོད། རྒྱལ་པོའི་སྐུ་གཤེན་སྤེ་ནེ་གུ་ཡིས་མཛད། མགར་བཙན་སྙ་ལྡོམ་བུ་དང་། དབས་ཏ་ར་ཁོང་ལོད་གཉིས་ཀྱིས་བློན་པོ་མཛད། (དགུང་ལོ་ཆུང་དུས་ཆབ་སྲིད་ཀྱི་ལས་དོན་ཕལ་ཆེ་བ་བློན་པོ་མགར་སྟོང་བཙན་གྱི་བུ་མགར་ཁྲི་འབྲིང་གིས་དབང་ཆ་བཟུང་བ་དང་། མགར་གྱི་བུ་གཞན་པ་ཁག་ཅིག་གིས་དམག་དཔོན་མཛད་པ་སོགས་ལོ་མང་པོ་ཞིག་གི་རིང་ལ་མགར་གྱི་རིགས་རྒྱུད་རྣམས་ཀྱིས་སྲིད་ཞུ་བསྒྲུབས་པར་གྲགས། དོན་རྐྱེན་ཕྲན་བུ་ལ་བརྟེན་ནས་ཁྲི་འབྲིང་གིས་རང་སྲོག་བཅད། དེ་ནས་ཆབ་སྲིད་ཀྱི་འགན་དབང་གཙོ་བོ་མ་ཡུམ་ཁྲི་མ་ལོད་ཀྱིས་བསྐྱངས་བར་གྲགས་སོ།།