༄༅།།རྫ་ཆུའི་དཔྱད་བརྗོད།།        ་         བོད་མདོ་དབུས་མཐོ་སྒང་ནས་བཞུར་བའི་ཡོངས་སུ་གྲགས་པའི་ཆུ་བོ་ཆེན་པོ་རྨ་འབྲི་རྫ་གསུམ་དང་རྒྱལ་མོ་རྔུལ་ཆུ་བཅས་ཡོད་པའི་ནང་ནས།    ད་ལམ་རྫ་དཀར་ནག་ལྕིབས་གསུམ་གྱི་གཞུང་ནས་ཐོན་པའི་ཆུ་བོ་རྫ་ཆུ་གཡུ་འབྲུག་གྱེན་འགྲོས་ཀྱི་མགོ་ཁུངས་ཅུང་ཙམ་ཞིག་བརྗོད་ན།    ༈ རྫ་ཆུའི་མགོ་ཁུངས་ནི་དགེ་རྒྱལ་རྫ་དཀར་ནག་ལྕིབས་གསུམ་ཞེས་པའི་གཞུང་ཆེན་ལུང་པ་ཁ་ནུབ་ཏུ་བསྟན་པ་ལྟ་བུའི་གསུམ་ཡོད།    ལུང་པ་དེ་གསུམ་གྱི་མགོར་རྫ་ནག་རི་རྒན་མའམ་སྔོན་སློབ་དཔོན་ཆེན་པོས་དམ་བཞག་སྐབས་གསོལ་བའི་མཚན༼ཕྱྭ་རྒྱལ་མེ་ཏྲི༽མིང་གཞན་དུ་རྫ་སྟོད་རྒྱལ་ལམ་རྫ་ནག་རི་རྒན་མ་ཞེས་པའི་རི་བོ་དེར་ཡོད།    རྫ་ནག་རི་རྒན་གྱི་གཡས་ཕྱོགས་རྫ་ནག་ལུང་པའི་རི་རྒྱུད་ཀྱི་རྫ་ནག་ཧོར་པ་འབྲུག་དེའུ་ནས་བབས་པའི་རྫ་ནག་ཆུ་དང་།    གཡོན་རྫ་དཀར་ལུང་པའི་རི་རྒྱུད་ཆུ་མགོ་བཀྲ་ཤིས་འཁྱིལ་བ་ནས་ཐོན་པའི་རྫ་དཀར་ཆུ་བོ་དང་།    རྫ་ནག་རི་རྒན་གྱི་མདུན་ཕྱོགས་རྫ་ལྕིབས་ལུང་པའི་ནང་ནས་ཐོན་པའི་རྫ་ལྕིབས་ཆུ་བོ་དང་གསུམ།    རྫ་ནག་རི་རྒན་གྱི་ཤར་ཕྱོགས་སྤྱི་ལེ་སུམ་ཅུའི་ཡན་མན་གྱི་མཚམས་ནས་ཆུ་བོ་གསུམ་ལྷན་དུ་འདུས་པའི་སར་རྫ་སྙིང་དཀར་ནག་སུམ་མདོ་ཞེས་ཟེར།    ཡུལ་ལྷའི་བརྒྱག་བརྔན་ཆེན་མོའི་ནང་།  ༼རྫ་སྙིང་དཀར་ནག་སུམ་མདོ་བརྔན༽  ཞེས་པའི་ས་དེ་ཡིན།    རྫ་དཀར་ནག་ལྕིབས་གསུམ་འདུས་པའི་ཆུ་བོ་དེ་ཤར་དུ་བབས་ནས་དེང་དུས་རྫ་སྟོད་རྫོང་མཁར་ནས་བབས་པའི་རྫ་ཆུ་ཞེས་པའི་ཆུ་བོ་དེའོ།    དེ་ཡང་སྔོན་དུས་ནས་བརྗོད་སྲོལ་ལྟར་ན་ཆུ་བོ་དེ་ཉིད་སྟོད་ནས་འབབ་སྐབས་དགེ་རྒྱལ་རྫ་ཆུ་ཞེས་འབོད་པ་དང་།   བར་ནང་ཆེན་ས་ནས་ནང་ཆེན་རྫ་ཆུ་དང་།    སྨད་ཆབ་མདོའི་ས་ནས་རྫ་ཆུ་དང་ལྕི་ཆུ་གཉིས་ཟླ་སྒྲིལ་ནས་འབབ་པའི་དུས་ཆབ་མདོའི་ཟླ་ཆུ་ཟེར།    རིམ་བཞིན་བབས་མཐར་བྲག་གཡབ་ས་ནས་བྲག་གཡབ་གླ་ཆུའམ་ཁམས་པ་གླ་ཆུ་ཞེས་དང་།    ཕྱི་རྒྱལ་ཁབ་ཀྱི་ས་ནས་མེས་ཀོང་གཙང་པོ་ཞེས་འབོད་པའོ།།                                                དེ་ལ་གནའ་བོའི་ངག་རྒྱུན་ལ་ཡང་རྫ་ནག་རི་རྒན་གྱི་བཙུན་མོ༼ཀླུ་བཙན་ལྷ་མོ་ཏྲི་ཏ་མ༽མིང་གཞན་དུ་རྒོད་མཆུ་མ་ཟེར་བ་དེ་ཉིད་ནམ་ཞིག་གི་ཚེ་གཤོག་པ་བསྐྱངས་སྡེར་མོ་བསྒྲད་ནས་རྨ་ཡུལ་དུ་འཕུར་གྲབས་བྱེད་པས།    རྫ་ནག་རི་རྒན་གྱིས་བྱང་ཨ་ཆེན་དགྲ་སྒོ་དགག་རྒྱུ་དང་ཤར་རྨ་སྨད་གྲོ་མ་རྐོ་རྒྱུ་གཉིས་ཡོང་མ་རེད་ཅེས་རི་རྒན་རང་ཉིད་ཀྱི་རྒྱབ་ཕྱོགས་སུ་བཞག་པ་དང་འཇུག་སྒྲོའི་ཟངས་རྡོ་རི་བཞག་པས་འཕུར་མ་ཐུབ་པ་དང་སྡེར་མོ་བསྒྲད་པའི་སར་ཆུ་བྱུང་བ་དེ་རྫ་དཀར་ནག་གཉིས་ཀྱི་ཆུ་མགོ་འདི་བྱུང་རེད་ཅེས་སྔ་རབས་རྒན་མི་རྣམས་ཀྱི་ངག་རྒྱུན་དུ་ཤོད་སྲོལ་ཡང་ཡོད།    དེའི་རྒྱུ་མཚན་གྱིས་བཙན་ནི་རྒོད་མཆུ་མ་དང་།    ཆུ་མགོ་གཉིས་ལ་ཀླུ་གནས་པས་རི་ཆུ་གཉིས་ཀླུ་བཙན་ཁ་སྤྲོད་ཡིན་པའི་ཕྱིར་ཀླུ་བཙན་ལྷ་མོ་ཏྲི་ཏ་མ་ཞེས་མིང་འབོད་དོ།།                    ་       ༈ དེ་ལ་དེང་དུས་སུ་མི་རྣམས་ཀྱིས་ལྟ་བ་མི་འདྲ་སྣ་ཚོགས་པ་སྟེ་འགའ་ཞིག་གིས་ཆུ་བོ་འདི་ཧྲིལ་བོར་ཟླ་ཆུ་ཞེས་མིང་བཏགས་ན་ཆོག་ཚུལ་དང་།    འགའ་ཞིག་གིས་ཆུ་བོ་འདི་མགོ་ཁུངས་ཟླ་བའི་དབྱིབས་ལྟ་བུ་ཡོད་པས་ན་ཟླ་ཆུ་འབོད་དགོས་ཞེས་དང་།    ཡང་འགའ་ཞིག་གིས་སྔོན་གྱི་ཡིག་རྙིང་ག་གེ་མོ་ཞིག་ཏུ་ཟླ་ཆུ་ཞེས་འཁོད་འདུག་པས་ན་ཟླ་ཆུ་དང་ཟླ་གཞུང་ཞེས་འབོད་ན་འཐད་ཅེས་གླེང་སྲོལ་སྣ་ཚོགས་པ་ཡང་ཡོད།    ༈ དེ་ལ་ཁོ་བོའི་དྲང་པོ་དྲང་བདེན་གྱི་སྒོ་ནས་བློ་གཟུ་བོར་དཔྱད་བརྗོད་ཞིག་བྱས་ན་གོང་འཕྲོས་བཞིན་དགེ་རྒྱལ་རྫ་ཆུ།    བར་ནང་ཆེན་ས་ནས་ནང་ཆེན་རྫ་ཆུ།    སྨད་ཆབ་མདོའི་ས་ནས་ཆུ་བོ་ཆེན་པོ་གཉིས་ཟླ་སྒྲིལ་ནས་བབས་པ་ལ་ཟླ་ཆུ་འབོད་པ་ནི་གནའ་དེང་གཉིས་ནས་ཡོངས་གྲགས་ཡིན།    དཔེར་ན་མི་ཞིག་ལ་མགོ་ལ་མགོ་ཡི་མིང་དང་།    སྐེད་པ་ལ་སྐེད་པའི་མིང་།    ཕོ་བ་ལ་ཕོ་བའི་མིང་།    རྐང་པ་ལ་རྐང་པའི་མིང་འདོགས་དགོས་པ་ལྟར་རྫ་ཆུ་འདི་ལ་དེ་བཞིན་དུ་གྲུབ་ཡོད།   གོང་གི་འབྲེལ་བརྗོད་དེ་དག་ལ་ཆུ་བོ་འདིའི༼མགོ་ཁུངས་ཟླ་བ༽ལྟ་བུ་ཡོད་ཅེས་པ་དེ་ཡང་རྫ་ནག་གི་ཆུ་མགོ་ཧོར་པ་འབྲུག་དེའུ་ལ་ནོར་བུའི་དབྱིབས་ཅན་དང་།    རྫ་དཀར་ཆུ་བོའི་མགོ་ཁུངས་བཀྲ་ཤིས་འཁྱིལ་བ་ལ་དུང་དཀར་གྱི་དབྱིབས་ཡོད་ཅེས་སྔོན་བྱོན་མཁས་པ་དང་།     དམ་པ་གོང་མ་མང་པོ་དང་ཁྱད་པར༼གོང་ས་ལྔ་པའི༽སྐབས་གསུང་པའི་ཞལ་རྒྱུན་འཁྲུལ་མེད་ཡིག་རྙིང་དག་ཏུ་འཁོད་ཡོད་པ་དག་ལ་ཟླ་བ་ལྟ་བུའི་དབྱིབས་ཡོད་ཅེས་བཤད་མེད།    སྔོན་གྱི་ཡིག་རྙིང་ཁག་ཏུ༼ཟླ་ཆུ༽ཞེས་འཁོད་པས་འུ་ཚོས་ཟླ་ཆུ་བྲིས་ན་ལེགས་པར་བཤད་འདུག་ཅིང་དེ་ཡང་ཞིབ་དུ་དཔྱད་ན་ཡིག་རྙིང་རེ་རེ་གཉིས་གཉིས་ནང་ནས་འབྱུང་བའི་ཟླ་སྒྲ་དེའང་མདོ་སྨད་ཆབ་མདོའི་ས་ཆ་ནས་མཁས་པ་དང་བླ་མ་རྣམ་པས་གསུང་པའི་ཟླ་སྒྲ་ཡང་འབྱུང་འདུག་པ་དེ་ཡང་སྒྲ་ལྕི་ཡང་དང་དགོས་མཁོའི་ཕྱིར་མ་གཏོགས་གཞན་པའི་ཡིག་རྙིང་དག་ཏུ་ཟླ་སྒྲ་མི་འདུག    ཡང་འགའ་ཞིག་གིས་ཆུ་བོ་འདིའི་མིང་ཧྲིལ་བོར་ཟླ་ཆུ་ཞེས་བཏགས་ན་ལེགས་ཅེས་པ་དེའང་གོང་ནས་བཤད་པ་ནང་བཞིན་མི་ཞིག་གིས་མགོ་ལུས་རྐང་པ་དང་མཚུངས་པས་རྐང་པའི་མིང་མགོ་ལ་བཏགས་ན་མི་མཛེས་པ་བཞིན་ཆུ་བོ་འདི་ཡང་ཡུལ་གྲུ་རེ་རེ་བཞིན་རྒྱུད་སྐབས་ནས་བྱུང་བའི་མིང་བཏགས་དེ་ལོ་ངོ་སྟོང་ཕྲག་གི་ཡར་སྔོན་ནས་བཏགས་མིང་དངོས་དེ་རྒྱུན་སྐྱོང་བ་ལས་དེང་སངས་མཁས་པར་རློམ་པའི་དེབ་རྒན་རེ་ཡི་ངོགས་སུ་བསམ་བཞིན་དུ་འཁྱོག་བཤད་ཀྱིས་བསྒྱུར་བཅོས་བཏང་བའི་ཡིན་མདོག་གི་ཁ་ཕོ་རེ་བྱས་ན་དེ་ནི་ལོ་རྒྱས་ནག་གསུབ་བྱེད་པའི་ཉེས་པ་ཞིག་མ་གཏོགས་ཅི་ཡང་མ་མཐོང་ངོ་།།