སྤྱི་ལོ་ ༡༩༦༨ ལོ་ཙམ་ལ་བལ་ཡུལ་ཀ་ཐ་མན་གྲུ་ཉེ་འགྲམ་དུ་ནང་ཆེན་ཉེར་ལྔའི་ཁྱབ་ཁོངས་ནས་ཡིན་པའི་སྒ་པ་དར་རྒྱས་དང་། སྒ་པ་ཉི་དགའ། ནང་ཆེན་པ་དབང་ཆེན། ནང་ཆེན་ནམ་མཁའ་ཟེར་བའི་རྒན་པོ་བཞི་ཡོད། ཁོང་རྣམ་པ་བཞི་ཡིས་གྲོས་མོལ་གནང་ནས་སྟོད་པ་ལ་ཡང་སྐྱིད་སྡུག་འདུག དབུས་གཙང་ལ་ཡང་སྐྱིད་སྡུག་འདུག སུ་ལ་ཡིན་ན་ཡང་རང་རང་སོ་སོ་ལ་སྐྱིད་སྡུག་འདུག ང་རང་ཚོ་ལ་ཡང་སྐྱིད་སྡུག་ཞིག་དགོས་ཀྱི་འདུག་གསུངས་ནས་སྒོར་མོ་ལྔ་རེ་ཙམ་དང་བཅུ་རེ་ཙམ་རེ་བསྡུས་ནས་བཙུགས་པ་རེད། དེའི་མཚམས་ནས་བལ་ཡུལ་ལ་ཡོད་པའི་དེམ་ཆི་ཉེར་ལྔའི་བླ་མ་དེལ་ཡག་ཟླ་བཟང་རིན་པོ་ཆེ་དང་། ས་བཅུ་རིན་པོ་ཆེ། ཁྲ་རིག་རིན་པོ་ཆེ། སྤྲུལ་སྐུ་ཨོ་རྒྱན་རིན་པོ་ཆེ། ཁོང་རྣམ་པ་ལ་ཞུས་ནས་བླ་མ་རྣམ་པས་ཀྱང་ཡག་པོ་འདུག་གསུངས་ནས་བཀའ་ཁྲོལ་གནང་ཞིང་ཁོ་ཚོས་སྒོར་མོ་བཅུ་ཙམ་རེ་བསྡུ་རུག་བྱས་ཤིང་ཐུགས་སྤྲོ་བཏང་ཞིང་བླ་མ་རྣམ་པ་གདན་འདྲེན་ཞུས་རིན་པོ་ཆེ་རྣམ་པས་ཡང་དེ་སྐབས་དཔེ་ཤག་སྐོན་པོ་ཡིན་ན་ཡང་སྒོར་མོ་ ༢༥ ཙམ་རེ་གསོལ་རས་གནང་ནས་ནང་ཆེན་ཉེར་ལྔའི་སྐྱིད་སྡུག་ཚོགས་པ་ཚུགས་དགོས་ཀྱི་འདུག་གསུངས་པ་རེད། དེ་ནས་གྲྭའུ་བེ་ཧུ་དང་། ཁྲི་འདུ་བེ་ཧུ་འཆི་མེད་རྣམ་རྒྱལ། དཔོན་རུ་བེ་ཧུ་གྲགས་པ་རྣམ་རྒྱལ། འབྲོང་སར་བེ་ཧུ་ནམ་མཁའ་རྡོ་རྗེ། དགེ་རྒྱལ་བར་མ་བེ་ཧུ་འོད་གསལ་ཁོང་རྣམ་པ་གང་དགས་ཡར་མར་སྐད་ཆ་བྱས་ནས་གཙོ་བོ་སྡོམ་བཟའ་ཚེ་རིང་ཆོས་སྒྲོན་སྐབས་དེ་དུས་བོད་མི་མང་གི་སྤྱི་འཐུས་ལས་ཐོག་རེད། ཁོང་རྣམས་སྤྱི་མཐུན་གྱི་སྒོ་ནས་ཚོགས་པ་དེ་བཙུགས་པ་རེད། རིམ་བཞིན་ལོ་རེ་ལ་ཐུགས་སྤྲོ་འདྲ་བཏང་ནས་ཚོགས་པ་གང་མཚམས་ཡར་རྒྱས་སོང་བ་རེད། དེའི་མཇུག་ནས་དགེ་རྒྱལ་བར་མའི་འོད་གསལ་ཚོགས་གཙོ་བྱས་ཤིང་ལྷག་བསམ་ལྷོད་མེད་ཐོག་ནས་འགན་ཁུར་གནང་ནས་ཚོགས་པ་ཇེ་རྒྱས་སུ་སོང་མི་ཡང་མང་རུ་སོང་ཞིང་ཡག་པོ་ཆགས་ཡོད། དེའི་རྗེས་སུ་སླེ་བེ་ཅང་ཚེ་རིང་རྡོ་རྗེ་ཁོང་ཚོགས་གཙོ་གནང་བ་རེད། དེའི་སྐབས་སུ་རྒས་གསོ་ཁང་ཞིག་བཙུགས་ནས་སྤྱི་ཚོགས་ཞབས་ཞུ་བླ་མེད་འགྲུབ་ཡོད་རེད། གཞན་ཡང་ནང་ཆེན་ཉེར་ལྔའི་མི་མང་ལ་ན་ན་ནད་གཡོག་དང་ཤི་ན་ཕུང་པོ་མེར་བསྲེག་གཏོང་བ་སོགས་ཞབས་ཞུ་ཡག་པོ་སྒྲུབ་ཡོད་འདུག དེའི་རྗེས་སུ་དིལ་ཡག་དགོན་པའི་གྲྭ་པ་ཨ་ཉེ་ཨ་བྷོ་ནས་ཚོགས་གཙོ་བྱས་ནས་རྒྱུན་སྐྱོང་བྱས་ཡོད། དེའི་རྗེས་སུ་འབྲོང་པ་བེ་ཧུ་གཡུ་རྒོད་ཚོགས་གཙོ་གནང་ནས་ལོ་རྟག་པར་ཐུགས་སྤྲོ་བཏང་ནས་དཔེ་ཡག་པོ་འདྲ་བྱུང་ཡོད། དེ་ཡི་སྐབས་སྤྱི་ལོ་ ༢༠༠༨ ལོ་ནས་ནང་ཆེན་ཉེར་ལྔ་གཞི་བྱེས་གཉིས་ཀྱི་ཚབ་བྱས་ནས་གོང་ས་མཆོག་ལ་བརྟེན་བཞུགས་ཕུལ་ཐུབ་པ་བྱུང་ཡོད། དེའི་རྗེས་སུ་ཚོགས་གཙོ་ཀརྨ་ཟླ་བ། ཚོགས་གཞོན་སྒ་པ་རིན་ཆེན་རྨད་བྱུང་། སྤྱི་ལོ་ ༢༠༡༠ ལོ་ཡུལ་ཤུལ་ས་འགུལ་གྱི་སྐབས་སུ་མཆོད་རྟེན་བྱ་རུང་ཁ་ཤོར་མདུན་དུ་བདུན་ཚིག་ཞེ་དགུ་འཚོགས་ནས་གདུང་སེམས་མཉམ་བསྐྱེད་ཀྱི་ཐོག་ནས་སྨོན་ལམ་འཚོགས་ཡོད། དེ་ནས་བཟུང་ཕ་ཡུལ་གཞིས་ལུས་མི་མང་ལ་གོད་ཆག་ཆེན་པོ་དེ་ཙམ་བྱུང་སོང་བས་ཐུགས་སྤྲོ་བཏང་ན་ཡག་པོ་མི་འདུག་ཟེར་ནས་ལོ་རེ་ལ་གུ་རུ་ཞི་བའི་ཚོགས་འབུམ་བལ་ཡུལ་དུ་ཡོད་པའི་ནང་ཆེན་ཉེར་ལྔའི་དགོན་སྡེ་ཁག་ཀྱི་བླ་གྲྭ་རྣམས་གདན་འདྲེན་ཞུ་ཞིང་འཚོགས་ཀྱི་ཡོད་རེད། སྤྱི་ལོ་ ༢༠༡༦ ལོའི་ཟླ་ ༤ པ་ཙམ་གྱི་ནང་ནས་རྒྱུན་ལས་གསར་པ་དགེ་རྒྱལ་བར་མ་རྣམ་ཚང་གི་ཚ་བོ་བླ་མ་ཨོ་སྤུག་ཚོགས་གཙོ་དང་། ཚོགས་གཞོན་ཤེས་རབ། ཆོས་དབྱིངས་རླུང་ཡང་། སྐལ་བཟང་ཉི་མ། དར་དར། བཅས་རྒྱུན་ལས་གསར་འདེམས་བྱས་ནས་ཚོགས་པ་ཡར་རྒྱས་དང་རྒྱུན་སྐྱོང་བྱེད་དང་བྱེད་མུས་སུ་གནས་ཡོད།