སྤུ་རྒྱལ་ཞེ་གསུམ་<ཞེ་གཉིས་>པ་དར་མ་འུ་དུམ་བཙན་པོ་ནི། ཡབ་ཁྲི་ལྡེ་སྲོང་བཙན་དང་། ཡུམ་འབྲོ་བཟང་ཁྲི་མ་ལེགས་གཉིས་ཀྱི་སྲས་སུ་ཕྱི་ལོ་ ༨༡༥ པའི་ཤིང་ལུག་ལོར་(འོན་ལྗང་རྡོ་རུ་)སྐུ་འཁྲུངས། ཕྱི་ལོ་ ༨༣༦ པའི་མེ་འབྲུག་ལོར་གཅེན་མངའ་བདག་ཁྲི་རལ་འདས་པ་དང་། རྒྱལ་སྲིད་ལ་བསྐོས། བཙུན་མོ་ཆེ་བ་སྣ་ནམ་བཟའ་དང་། ཆུང་བ་ཚེ་སྤོང་བཟའ་བཙུན་མོ་འཕན་གཉིས་ཁབ་ཏུ་བཞེས། (བློན་ཆེན་འབྲོ་ཁྲི་སུམ་རྗེ་སྟག་སྣང་གིས་བྱས་ཤིང་། ནང་བློན་དབས་རྒྱལ་ཏོ་རེ་སྟག་གཉས་བྱས།) ཐོག་མར་སངས་རྒྱས་ཆོས་ལུགས་ལ་དད་པ་བྱས། <དར་མས་འབྲི་ཡི་གཙུག་ལག་ཁང་དང་།> {སྤ་བྲོ་སྟག་ཁུག་གི་གཙུག་ལག་ཁང་སོགས་བཞེངས་}ནས་དཀར་པོ་ཆོས་ལ་གུས་པ་སོགས་སྔར་གྱི་ཡབ་མེས་གོང་མ་བཞིན་རྒྱལ་སྲིད་ཀྱི་ཆབ་འབངས་<ཉེར་ལྔ་པ་ལྕགས་བྱ་ལ་རྒྱལ་སྲིད་ཐོབ་ནས་འཇིག་རྟེན་ཕལ་སྤྱོད་རྣལ་མ་ལོ་གཅིག་>བསྐྱངས། དེ་ནས་བོན་བློན་རྣམས་ཀྱིས་བློ་ཁ་བསྒྱུར་བ་དང་།
དེ་རྗེས་དོན་རྐྱེན་འདྲ་མིན་ལ་སྙད་མདོགས་བྱས་ཏེ་མེས་པོ་གོང་མའི་རྟེན་ཁྱད་པ་ཅན་ལྷ་སའི་གཙུག་ལག་ཁང་གི་ཇོ་ཤག་རྣམ་གཉིས་དང་བསམ་ཡས་སོགས་གཏོར་མགོ་ཚུགས་ཤིང་། ལྷ་ཁང་མང་དུ་བཤིགས། གསུང་རབ་གང་རྙེད་མེ་དང་ཆུར་བསྐྱུར། ལོ་པཎ་ཕལ་ཆེར་ཡུལ་གཞན་དུ་བྲོས། བཙུན་པའི་སྡེ་རྣམས་ཁྱིམ་པར་བབས་སུ་བཅུག་པ་སོགས་ཀྱི་སྐབས་ཙམ་ན། གནུབས་སངས་རྒྱས་ཡེ་ཤེས་དང་འཕྲད་ནས། ཁྱོད་སུ་ཡིན་དྲིས་པས། ང་དཀོན་མཆོག་སྔགས་པ་བྱ་བ་ལས་སུ་སངས་རྒྱས་ཀྱི་བསྟན་པ་སྲུང་བ་ཡིན། རྒྱལ་པོས་ངས་བསྟན་པ་བཤིག་ཟིན། ཁྱོད་ལ་ནུས་པ་ཅི་ཡོད་ཟེར་བ་དང་། སྔགས་བཟླས་པའི་ནུས་པ་གཟིགས་གསུངས་ནས་སྔགས་ཀྱི་ནུས་བསྟན་པས། རྒྱལ་པོ་འཇིགས་ཤིང་སྐྲག་སྟེ་སྔགས་པའི་སྡེ་ལ་གནོད་མི་བསྐྱེལ་བར་དམ་བཅས། དེ་ནས་ཁོང་གི་སངས་རྒྱས་ཀྱི་བསྟན་པ་སྤྱི་དང་གསང་སྔགས་བླ་མེད་ནང་རྒྱུད་སྡེ་གསུམ་གྱི་སྨིན་གྲོལ་མན་ངག་རྒྱ་མཚོའི་སྲོག་བཟུང་བས་ན་བཀའ་དྲིན་ཤིན་ཏུ་ཆེ། བཙན་པོའི་སྐབས་ཀྱི་ཁྲིམས་ཡིག་སོགས་གསུང་རབ་མང་པོ་ཞིག་བྲག་ཕུག་ཏུ་སྦས་ཡོད་སྐད། ཕྱི་ལོ་ ༨༤༡ ལོར་དེ་ཙམ་ན་ལྷ་ལུང་དཔལ་རྡོར་གྱིས་རྟགས་དང་ཆ་ལུགས་བརྗེས་ནས་ཕྱག་ཏུ་ལྕགས་མདའ་དང་ལྕགས་གཞུ་ཐོགས་པ་དང་། ལྷ་སར་ཕེབས་སྐབས་དར་མས་གཙུག་ལག་ཁང་གི་རྡོ་རིང་ཡི་གེ་ཀློག་ནས་བསྡད་ཡོད་པ་དང་སྟབས་འཁེལ་བའི་མདའ་འཕངས་ཏེ་རྒྱལ་པོའི་སྙིང་ལ་ཕོག་ནས་བཀྲོངས་བའི་བར་<ཚུལ་ངན་ལ་སྤྱོད་པ་ལོ་གཉིས་དང་ཟླ་བ་དྲུག དེ་ནས་སངས་རྒྱས་ཀྱི་བསྟན་པ་རིན་པོ་ཆེ་ལ་འཚེ་བ་ཁོ་ན་ལྷུར་ལེན་པ་ལོ་གཅིག་དང་ཟླ་བ་ཕྱེད་གཉིས་བྱས་>པར་བཞེད། <དེའི་བང་སོ་འཕྲུལ་དང་རྒྱལ་ཆེན་བར་དུ་བརྩིགས་ པ་འཕྲོར་ལུས་>ཡོད་པར་འདོད་དོ།།
འུ་དུམ་བཙན་པོ།
ལྷ་སྲས་དར་མ་ཡང་འབོད། འདི་ནི་དུས་རབས་བཅུ་གཅིག་རྗེས་ཀྱི་རྒྱལ་རབས་ཆོས་འབྱུང་ཁག་གི་ནང་ཐུན་མོང་དུ་སྤྱོད་པའི་རྒྱལ་པོ་འདིའི་མིང་ལྷག་ཅིག་ཡིན་པར་འདོད་པ་དང་། རྒྱལ་པོ་ཁྲི་ལྡེ་སྲོང་བཙན་གྱི་སྲས་རྒྱལ་རབས་ཞེ་གཉིས་པ་དེ་ཉིད་ཡིན་པར་གྲགས་སོ།།
བླ་ཆེན་དགོངས་པ་རབ་གསལ།
བསྟན་པའི་མེ་རོ་མདོ་ཁམས་སྨད་ནས་སློང་བར་གྲགས་པའི་སྐྱེས་བུ་ཆེན་པོ་བླ་ཆེན་དགོངས་པ་རབས་གསལ་ནི། ཕྱི་ལོ་ ༨༩༢ ལོ་ཙམ་ལ་འཁྲུངས། ཕྱི་ལོ་ ༩༠༦ པའི་མེ་སྟག་དགུང་ལོ་བཅོ་ལྔའི་ཐོག་རབ་ཏུ་བྱུང་སྟེ་བསྟན་པའི་མེ་རོ་མདོ་ཁམས་སྨད་ནས་གསོས་པས་བསྟན་པ་ཕྱི་དར་གྱི་དབུ་བརྙེས། ། དེ་ནས་དགུང་ལོ་ཉི་ཤུ་པའི་ལྕགས་ལུག་ལོར་བསྙེན་པར་རྫོགས། དགུང་ལོ་ཉེར་ལྔ་པའི་མེ་བྱི་སྟེ་ཕྱི་ལོ་ ༩༡༦ ལོར་དབུས་གཙང་གི་མི་བཅུ་མདོ་ཁམས་སྨད་དུ་ཕེབས་པ་དང་། བླ་ཆེན་གྱིས་མཁན་པོར་མཛད་ནས་མི་བཅུ་དུས་གཅིག་ལ་བརྙེན་པར་རྫོགས། ཕྱི་ལོ་༩༡༨ ལོར་དབུས་སུ་བསྟན་པ་ཕྱི་དར་གྱི་འདུལ་སྡེ་གསར་དུ་བྱུང་བ་ཡིན། དེ་ལྟར་བོད་ཡུལ་ཀུན་ཏུ་འདུལ་བའི་བསྟན་པ་སླར་གསོས་མཛད་ཅིང་བསྟན་པའི་སྙིང་པོ་ཉི་མ་ཤར་བ་བཞིན་ཏུ་དར་རྒྱས་ཆེན་པོ་བྱུང་ཞིང་། མཐར་དགུང་ལོ་གྱ་བཞི་ཙམ་ན་དགོངས་པ་ཆོས་དབྱིངས་སུ་ཐུམ་པར་གྲགས་པ་ཡིན།
(ཕྱི་ལོ་་༩༤༣་པར་བླ་ཆེན་དགོངས་པ་རབ་གསལ་དང་དབུས་གཙང་གི་མི་བཅུས་ཁམས་ནས་དབུས་སུ་བསྟན་པ་ཕྱི་དར་གྱི་འགོ་ཚུགས་པ་ལ་བསྟོད་བཀུར་ཚད་མེད་པ་གྲགས་པ་ཡང་མངའ་བདག་དཔལ་འཁོར་བཙན་ཡང་ཡབ་སྲས་བདུད་འཇོམས་རྒྱལ་རབས་ཨང་་༢༣༡་་) ལྷ་ལུང་དཔལ་རྡོར།
མེ་ཕོ་སྟག་གི་ལོ་ལ་སྐུ་འཁྲུངས་ཤིང་། དགུང་ལོ་བཅུ་བདུན་པ་ཆུ་ཕོ་རྟའི་ལོར་མོན་སྤ་གྲོ་སྟག་ཚང་དུ་སློབ་དཔོན་པདྨའི་ཞལ་མཇལ་ཞིང་མཁའ་འགྲོ་ཡེ་ཤེས་མཚོ་རྒྱལ་གྱིས་རྗེས་སུ་བཟུང་། གདམས་ངག་གི་བཀའ་བབས་ཏེ་ཡི་དམ་གྱི་ལྷ་དང་བླ་མས་བདུད་འདུལ་དཔའ་བོར་ལུང་བསྟན་པས་མཚན་ཡང་ལྷ་ལུང་དཔལ་གྱི་རྡོ་རྗེར་གྲགས། རྒྱལ་པོ་སྡིག་ཅན་སྒྲོལ་དུས་དགུང་ལོ་དྲུག་ཅུ་རེ་གཅིག་ངོ་མཐོང་ཙམ་དུ་ཕེབས་པ་དང་། དེ་རྗེས་ཁམས་སུ་བླ་ཆེན་དགེ་བ་རབ་གསལ་གྱི་བསྙེན་པར་རྫོགས་པའི་ཁ་སྐོང་གི་དགེ་སློང་རྒྱ་ནག་ནས་ཧ་ཤང་གཉིས་འབད་པས་བཙན་བའི་གྲོགས་ཀྱང་མཛད་ཅིང་། དུས་ཕྱིས་གནམ་ལྡེ་འོད་སྲུང་ལ་སྨན་བླ་བདེ་གཤེགས་བདུན་གྱི་མདོ་ཆོག་གི་ལུང་བྱིན་པར་ཡ་བཤད་པས་སྐུ་ཚེ་ལོ་བརྒྱད་ཅུ་ལྷག་ངེས་ཞིག་བཞུགས་པར་སྣང་ལ། གངས་ཅན་འདིར་རྒྱལ་བསྟན་རིན་པོ་ཆེ་མི་ནུབ་པའི་རྒྱལ་མཚན་དུ་སྒྲེང་བ་པོ་འདི་ཁོ་ན་སྟེ་བཀའ་དྲིན་རྣམ་པར་ཀུན་ཏུ་དྲན་པའི་གནས་སོ།།
༡༽ཡེར་པའི་ལྷ་རི་སྙིང་པོ་ན་སྤེའུ་སེ་རུ་མ་རུ་ན། ལྷ་ལུང་དཔལ་གྱི་རྡོ་རྗེ་སྔགས་བཙུན་ཤེས་རྩལ་དང་ལྡན་པ་གཅིག་སྒོམ་བྱེད་པའི་དུས་སུ། ནམ་ཕྱེད་ཙམ་ན། དཔལ་ལྷ་མོ་བུད་མེད་ཀྱི་གཟུགས་སུ་དངོས་སུ་བྱུང་ནས། དེང་སང་བོད་ན་གྲུབ་ཐོབ་མང་ཡང་། དུས་ལ་མ་བབས་པས་ཁྱོད་ལ་གྲུབ་ཐོབ་ཐམས་ཅད་ཀྱི་བྱིན་རླབས་ཞུགས་པས། རྒྱལ་པོ་སྡུག་ཅན་གསོད་རན་ཟེར་བ་ཞིག་བྱུང་།